Wanawake Micheweni Wageukia Kilimo cha Mbogamboga

WANAWAKE MICHEWENI WAGEUKIA KILIMO CHA MBOGA MBOGA

Na Ali Haji Hamad, Pemba Press Club

Baada ya kuvunjika moyo na kazi ngumu ya kilimo cha mwani na mapato madogo yanayopatikana katika kazi hiyo,wanawake katika wilaya ya Micheweni -Pemba sasa wameanza kugeukia kilimo cha mboga mboga kama njia ya kujiongezea kipato na kupambana na umaskini.

Wanawake hao kutoka shehia za Shumba mjini, Micheweni, Mjini wingwi, Njuguni na Mjananza wanajishughulisha na kilimo cha mchicha tungule, pipili mboga, mabilingani na vitunguu kama njia mbadala ya kujipatia kipato.

Katika shehia ya Shumba mjini ambako kwa miaka mingi iliyopita wananchi wa huko walikuwa wakidhani kwamba kilimo cha mboga mboga hakiwezi kustawi, sasa kuna zaidi ya vikundi vitano vya mboga mboga kwa mujibu kwa mujibu wa afisa wa mradi wa kuwawezesha wanawake Zanzibar WEZA, Jitihada Abdalla.

Mwenyekiti wa kikundi cha Mshikamano, mojawapo ya vikundi vya Shumba mjini bi Assaa Shapandu Makame amesema kuwa kikundi chao chenye wanachama 12 wote wanawake kimeanza kuona matunda ya kilimo hicho muda mfupi tokea kuanza na shughuli hiyo.

Amesema awali kikundi chao kilianza kama kikundi cha kuweka na kukopa chini ya mradi wa kuwawezesha wanawake Zanzibar WEZA hadi pale maafisa wa mradi huo walipowashawishi kujaribu kilimo cha mboga mboga ili kupata michango ya kuweka hisa badala ya kutegemea mwani pekee.

Amesema sasa wameanza kilimo cha mboga na wameanza kuvuna na kuweka kwenye kisanduku chao kiasi cha shilingi 20,000/=

Fatuma Kombo Ali, mwanachama wa kikundi hicho amesema japo kiwango cha fedha kinaonekana kidogo lakini faida ianyopatikana katika kilimo hicho ni kubwa kwa vile klilimo cha mboga mboga hakitumii muda mwingi na mwanamke anaweza kukiendesha bial kuathiri shughuli za utunzaji familia.

“Ukilima mwani siku nzima unakuwa hupo nyumbani, hujui wanao walalo wala wanywalo, na ukirudi hunachochote zaidi ya machoka. Lakini mboga walima muda mdogo na ukiondoka una kichacha kimoja cha kitoweo” alisema Fatuma

Katika kikundi cha Subira ni njema cha hapo hapo shumba bi Juma Makame amesema kikundi chao cha wanawake 13 ambacho nacho kinajishughulisha na kilimo cha mchicha na tungule wamefanikiwa kukusanya shilingi 70,000 katika jaribio lao la kwanza la mauzo.
“pesa tupatazo japoi si nyingi lakini na kazi tufanyayo nayo si kubwa kama ya mwani. Ukilima mboga mboga angalau wapata kufanya kazi nyengine za nyumbani”alisema

Bikombo Rashid Massoud mkazi wa Shumba mjini yeye ameamua kuendesha kilimo cha mboga mboga pekeyake bada ya kujifunza kutoka katika kikundi. Amesema anafanya hivyo ili kupata pesa pesa za kuweka hisa katika kikundi cha kuweka na kukopa cha mradi wao wa WEZA.

Amesema tokea kuingia katika kilimo hicho amekuwa na uhakika wa kujipatia shilingi 500 za kuweka katika kisanduku cha kikundi chao na ziada ya kutumia nyumbani.

Kuhusu soko la mboga mboga Bikwao Massoud Ali, mwanachama wa kikundi cha Wezarohoyo cha Mjiniwingwi amesema soko la mboga mboga katika Wilaya ya Micheweni lipo na nila uhakika kuliko soko la mwani. Amewaomba watu wa mradi wa WEZA na miradi mengine ya kuwaendeleza akina mama kuwasaidia kwa karibu akina mama wanaojishughulisha na kilimocha mboga mboga kwa kuwajengea miundo mbinu ya umwagiliaji ile waweze kuendesha kilimo hichi kwa mwaka mzima.

Mapema Jitihada Abdalla alifahamisha kuwa mradi wa WEZA ambao unaendeshwa
kwa pamoja na Shirika la CARE Austria na Chama cha Waandishi wa habari Wanawake TAMWA amesema katika mwaka huu mradi huu umeweka mkazo maalum katika kuwawezesha wanawake kijamii na kiuchumi huku ukiwahimiza kuendesha miradi yenye kuleta mafanikio ya haraka kwa ili kuwaongezea kipato chao na kuimarisha mchango wa sekta hiyo mkatika uchumi.